தேர்தல் அறிக்கை தயார் செய்யும் பணியில் தே.மு.தி.க.

| : Email this Arti அ.தி.மு.க. கூட்டணியில் இடம் பெற்றுள்ள தே.மு.தி.க.விற்கு 41 தொகுதிகள் ஒதுக்கப்பட்டுள்ளது. இதை தொடர்ந்து தே.மு.தி.க. சார்பில் போட்டியிட விரும்புபவர்களிடம் இருந்து விருப்பமனு பெறப்பட்டது. சுமார் 8 ஆயிரத்திற்கும் மேற்பட்டவர்கள் விருப்பமனு செய்தனர். தேர்தலில் போட்டியிட விருப்பம் தெரிவித்து விருப்பமனு செய்தவர்களிடம் நேர்காணல் கடந்த 11ந் தேதி கோயம்பேட்டில் உள்ள தலைமை அலுவலகத்தில் நடைபெற்று வந்தது. நிறைவு நாளான நேற்று கரூர் உள்பட சில மாவட்டங்களை சேர்ந்தவர்களிடம் நேர்காணல் நடைபெற்றது. நேர்காணலை கட்சியின் நிறுவன தலைவர் விஜயகாந்த் நடத்தினார். நேர்காணல் முடிவடைந்ததை தொடர்ந்து தேர்தல் அறிக்கை தயார் செய்யும் பணியில் தே.மு.தி.க. நிறுவன தலைவர் விஜயகாந்த், அவைத்தலைவர் பண்ருட்டி ராமசந்திரன், இளைஞரணி செயலாளர் சுதீஷ் ஆகியோர் ஈடுபட உள்ளனர். அ.தி.மு.க.விடம் இருந்து தே.மு.தி.க. போட்டியிடும் தொகுதிகள் விவரம் வெளியிடப்பட்டதை தொடர்ந்து, 41 தொகுதிகளில் தே.மு.தி.க. போட்டியிடும் வேட்பாளர்களை விஜயகாந்த் அறிவிக்க இருக்கிறார்.